Langethaler Nächt si läng!

Grad jetze chame sech das chum meh vorschtöue. Üsi wüude Zyte i däm schmucke Chly-Städtli wo denn grad früsch kes Dorf meh isch gsi. Do hani quasi glehrt, wases heisst i Usgang zgo. Me isch scho unger dr Wuche hie gsi, i mim Fau ar Bruefsschueu für zuekünftigi KV-ler. Dört het me aube ir Pouse scho chli Plän gschmiedet was me ächt de am Friti-Obe chönnt aschtöue. Müesst nech vorschtöue, denn im 1997i hets no kener Whatsapp-Gruppene gäh, ou ke Facebook oder Insta. So het me sech äbe im Rouchereggeli oder ufem Wäg a Bahnhof aube ustuuscht, ob ächt nöime es cools Konzi isch oder was dr Plan wär. Us irgendemne Grund ha ig dr Ruef gha, gäng chli zwüsse wo dr Bär tanzt. U so hets aube gäge s Weekend e chlineri Telefon-Chötti gäh, natürli no übers Feschtnetz! "Hey Fanki, weisch du ob z'Langetu öpis louft? Oder weimer eifach chli uf Beize-Tour?" - so hets öppe aube tönt.

Schliesslech isch me mitem Gleis 7 vo Buchsi id "Stadt" gfahre. Ume Heiwäg het me sech afe no kener Gedanke gmacht. Dr Letscht würdi 10 vor 1 jo no fahre, aber das luege mer de no. Gstartet hets mängisch afe mou im Räbstock. Verrouchnet und Lut isches dört gsi, aber äbe, s' Bier isch guet gsi und d Lüt ou. Jede het so chönne inecho wiener isch und wiener sech grad füehlt. Witer isches de ab zur Rita is Chrämi. Hie hei mängisch richtig geili Bands, ou usem Usland, gschpüut oder natürli ou legendäri Local-Heroes wie zum Bischpüu d'Jungs vo Tortilla Flat, Wazomba oder Palmer u vieli meh. Die Übermüetige hei säubschtsicher afe mou e Long-Island bschtöut. U dä hets nid i irgendemne so schigge, chliine Drink-Gläsli gäh, nei im grosszügige haubliter Glas natürli! Me het sech aube ou ustuuscht, wär ächt am meischte vo dene feine Tüüfus-Gsöff het möge trinke a eim Obe. Dr Tag danach weimer üs jetz gar nid vorschtöue.

Wemes de chli gseh het gha dört und neui Lüt het wöue träffe isch me eifach übere Wuhrplatz i, zur nöchschte Station: dr Spanier! Aber stopp, eifach so jede het hie nid ine chönne! Me het nämli es Member-Chärtli brucht, wo aber eifacher u vorauem günschtiger isch z'ergattere gsi, aus zum Bischpüu es VIP-Ticket amne YB-Match. Für dä chli Ufwand isch me de derfür mitem günschtigschte Bier wyt und breit belohnt worde. Wases aber nume hie het gäh, si die feine, spanische Heissgetränk namens "Carajillo" gsi oder natürli die knuschprig, würzige Pouletflügeli. Musig isch hie meh Hingergrund-Grüsch gsi, wo eh im ganze Gschwätz und em Chlepfe vom Töggelichaschte ungergange isch. Aber d Härzlechkeit vo de Gaschtgäber het eim eifach lang hie phaute.

Irgendwenn het me de aber s'Risse gha, jetz doch no chli go Party zmache. U de isch zum Glück d Truube grad wieder nume paar Hüser witer gsi. Afangs vom Däsu gfüehrt, spöter si de Alf und Karin hinger dr Theke gschtange. Do hets mängi unvergässlechli oder äbe vilech glich liecht vergässeni Nacht gäh. Mängisch mit Live-Sound u süsch immer mit de Local-DJs wo vo Indie-Klassiker über Rock-Hits bis Drum & Bass würkli für jede und jedi öppis hei gha. Später hani de säuber hin u wieder dörfe a de Plattetäuer stoh und scho das allei gubti gloubs no paar Gschichtli. Was dä Ort ouno bsungers gmacht het, isch dr Mix vo de Gäscht gsi. Vo de ganz junge Usgänger (wie mir denn) bis hi zum (würkli) Aut-Rocker und aui soziale Schichte. Und me het friedlech mitnang plagiert, philosophiert oder äbe ou mou s Tanzbei gschwunge.

Für ufe letscht Zug isch de hie meinschtens Ändstation gsi. Es hets de aber ou mou gäh, dass me het gfunge, me wöu no einisch es Huus witer. Vorhär het me de aber none chlini Stärkig brucht und isch zum Fäuber es Eierbrötli go hole. När hets aber gheisse: "Ab is CU"! Üsi Musig isches für üs rebellische u rächt alternative junge Lüt nid gsi. Oft si aktuelli Charts oder o mou Aprés-Ski Hits u Schlager gloffe. Aber i dere Stimmig hets eifach passt u me het de hie ou immer no einigi Nachtschwärmer wieder troffe, wome afangs nöime angers afe het gseh. S'het so das Feeling gha vo - mir möge no und jetzt wird nomou chli d Sou usegloh. Wenn de dr DJ d Playtaschte fürs letschte Lied drückt und s Barfrölein die letschti Rundi usgrüeft het, isch me de zwungenermasse wieder us däm Chäuer use und het dr Heiwäg aträtte. Wie gseit - wenns is CU gange bisch, het me die letschti ÖV-Verbindig eh scho verpasst gha. So simer de aube langsam losgloffe, stadtuswärts und hei uf guetmüetigi Outofahrer ghofft wo üs bis Buchsi mitnäh. Meischtens hets rächt schnäu klappet, mängisch simer aber haut ou 2 Stung heigloffe, was ou nid so schlächt do het.

Joo die länge Langethaler Nächt - ig wett se definitiv nid verpasst ha und cha mit guetem Gwüsse am Gölä widerspräche, vo wäge "I hätt no vüu blöder do". Einiges isch gange sithär, döu Sache gits no, döu nümme oder eifach ire angere Form aus denn. Und wie scho afangs erwähnt, isches momentan sowieso grad schwär, aus Spät-Teenie bzw. jungi Erwachseni chli Spass zha und mou wieder so richtig z feschte.

Aber ke Angscht, liebi Usgängerinne und Usgänger, sie chöme wieder, die Zyte!

comments powered by Disqus