11.11.2020... you broke my heart

Choufhüsi Langenthal
Choufhüsi, Langenthaler Fasnacht @masiwork

"Eh jez due doch nid so schwirig"
"D Wäut geit im fau nid unger wäge däm"
"Uh be ig froh, de muessi mi a däm Wucheändi nid doheim ibschliesse"
Das si Reaktione vo Lüt i mim Umfäud uf mini Antwort, wenn ig gfragt wirde wies mer dermit geit, dass d Fasnacht abgseit isch. Für vili isch das nid nachvollziehbar und ou absolut ir Ornig, wenn me e angeri Meinig het, aber nid jede wott d Meinig vo angerne zu gwüsse Theme immer ghöre und a Chopf knallt becho (gilt übrigens ou fürs Thema Corona😉)
Es interessiert mi nämmlech schlichtwäg e Scheiss, wöu ig ou e Meinig ha, ganz vieu Gfüeu und Erinnerige wo mit der Fasnacht Langethal verbunge si. Mis Härz blüetet imfau auso shut up. Danke!

Langenthaler Fasnacht
Guggenmusik Akkordwürger 2018


Wenn me nid igfleischte Fasnächtler isch, versteit me das gloub eifach nid. (Und es isch im Fau ou nid schlimm.) Aber es isch eifach meh aus 5 Täg ume suffe und dumm due (auso scho ou chlii aber nid ume, wie vili immer s Gfüeu hei.) Grad ir Guggemusig isches no mou spezieller. Du freusch di scho im August druuf, dass die Saison glii wider afoht, am Sunndioobe us de Trainerhose und no is Üebe bruucht aube hurti chli Überwindig, aber wenn de dert bisch u dini Gspändli um di ume hesch u mit dene zäme chasch Musig mache, de hani mängisch vor luter Vorfreud scho Hüenerhut. De chöme langsam die Uftritte a de verschidene Maskebäll, du hocksch i Car, mit de Lüt wo de gärn hesch, hesch s Kostüm vo letscht Johr am Füdle, wo jez de nümm magsch gseh u nimmsch e Fläsche Wysse mit ufe Wäg, du hesch scho im Car e lustigi Zyt, mir singe zäme Lieder u schnore chli dumm im züg ume. ( U das nüechtern wohlverstange, auso jo, nümm sooo aber ömu nid huere vou, du weisch wasi meine- spielbar, wie mir so schön säge.) De chunnsch dert ah u spieusch dis Repertoire ab und luegsch de Lüt zue wie si freud hei , tanze u feste. Ig säuber be i dene Momänte eifach ume zfride u glücklech. Luege i die Lüt und mache irgendwie es psychisches Reset. Ig vergisse aues wo mi grad belastet, aues wo mer grad der Schlof roubt und be eifach ume mit jedere Fasere vo mim Körper Happy. Der Würgerbau isch für mi de aube s Zeiche, dass d Fasnacht jez zum griffe nöch isch. I cha de aube chuum meh still hocke doheim wöui no chli mis Kostüm muess optimiere, wo zwar scho lang fertig isch oder mer chunnt no e gueti Idee und i bsteue no irgend e Seich z China. No chli festeri Näht mache, dasses de ou hebt und e Pellerine go poste....

Langenthaler Fasnacht
Guggenmusik Akkordwürger 2018


Und de chunnt dä Friti... ♥️ Ig packe mis Köfferli (guet das packi aube scho 2 Wuche vorher), bring mini Tochter zum Grosi (ke Angst se het ke Schade wäge däm, be wäge dem immer no es guets Mami 😉) und zieh für die kommende Täg is Hotelzimmer. I chas chuum erwarte, mis Kostüm z montiere und mini Posuune id Finger z näh. Jez chunnt mini Zyt, mini 5 Täg woni ume uf mi säuber darf ufpasse (mou besser, mou schlechter). U de geits loos, me trifft sich im Würgerchäuer und d Stimmig isch eifach ume toll. Me hets guet mitenang und lütet d Fasnacht ih. Me loht sich s erste mou lo Schminke u gseht wie si langsam aui itrudle u was si us ihrne Kostüm aues zouberet hei. Für mi aus Gwändlichef no mou e bsungere Momänt. Was de chunnt, si Täg vouer lache, Freud, müede Scheiche, Hunger, ab u zue es chlises Käterli, tanze, lüt träffe wo me mängisch ume ar Fasnacht trifft, dumm schnore, weni Schlof und vor auem Musig mache u derbii zfride hingerem Instrumänt vüregrinse. Aues vergässe, grad mou hurti ke Veratwortig ha fürs Ching, der Hushaut, ou nid as Schaffe dänke, wo eim mängisch stresst... Eifach gniesse und das i voue Züg!!!
Ig gloub die meiste verstöh mini Wort u gspüre was ig derbii gspüre.
Sit nid depro drüber, dass mer ke Fasnacht hei, es bringt nüt. Machet euchi Gedankeschublade uuf und näht die Erinnerige und Gfüeu füre mitemene Lächle.
Es wird wider besser und angers cho und wenn mir üs wider chöi ir Marktgass träffe und zäme spile und feste und d Sou useloh, denn gniesse mers um so meh!!!
I drücke i Gedanke jede Fasnächtler, aui mini Guggegspändli, d LFG ... u frisse es Eierbrötli uf jede, wo sich mit mir zäme uf das freut, wo wider wird cho und es wird unvergässlech wärde.

La Piazzetta
Fasnacht im La Piazzetta masiwork
Langenthaler Fasnacht
Langenthaler Fasnacht
comments powered by Disqus